Inwaragawag ti Bureau of Internal Revenue (BIR) ti panangipaatiddog iti amin a deadlines para iti panangipila ti tax returns, panagbayad kadagiti buis, ken panangipasa kadagiti kasapulan a dokumento, kas panangpakita ti dagus a tignay iti baet ti nakaro nga epekto nga imbati ti Super Typhoon Uwan.
Agbayag ti nasao nga extension agingga into Nobyembre 28 ita a tawen, ken para iti pagimbagan dagiti taxpayer a masarakan kadagiti lugar a nakaro a naapektaran ti bagyo, pakairamanan ti intero a National Capital Region (NCR), Cordillera Administrative Region (CAR), dagiti Rehiyon I agingga III, IV-A (CALABARZON), IV-B (MIMAROPA), V (Bicol Region), ken VIII (Eastern Visayas).
Karaman pay ti extension dagiti amin a Revenue District Offices (RDOs) a nakalanad ken nadamakt iti nairuar a pagannurotan ti ahensia.
Gagem ti addang a mangipaay ti naat-atiddog a panawen para kadagiti amin a taxpayer, dagiti empleyado ti BIR, ken dagiti Authorized Agent Bank a masarakan kadagiti lugar a direkta a naapektaran ti bagyo.
Daytoy nga addang ti ahensia ket paset ti Excellent Taxpayer Service program-da. Augie Arellano
