Awan ti nadangran ken naapektaran a populasyon iti napasamak a magnitude 4.3 a ginggined a nagsentro idiay San Isidro, Abra ken pannakarikna iti intensities iti dadduma a paset iti Ilocos Sur.
Iti pannaki-uman ti Bombo Radyo Vigan ken ni Rhon Arquelada a Provincial Disaster Risk Reduction and Management Officer, immunan a nairekord ti magnirude 4.1 a ginggined a nagsentro idiay San Quintin, Abra ngem sinukatan ti Phivolcs kalpasan ti assessment ket naingato ti magnitude 4.3 a ginggined ken nagsentro idiay San Isidro, Abra.
Segun ken ni Arquelada, ti nasao a ginggined ket nakaapektaranb ti intensities iti dadduma pay a lugar a kas iti Intensity IV idiay San Isidro ken Dolores, Abra ken Vigan City, Ilocos Sur; Intensity III idiay Pidigan ken San Quintin, Abra ken San Esteban, Ilocos Sur; Intensity II idiay Bangued, Bucay, Lagangilang, San Juan ken Tayum, Abra.
Narikna pay iti instrumental intensities wenno intensity III iti siudad ti Vigan ken ili ti Narvacan iti Ilocos Sur; ken Intensity II idiay Bangued, Abra.
Gapu ti ginggined ket naibakwit dagiti empleado iti kapitolyo iti Ilocos Sur kas panagannad ket insayangkatda iti duck, cover and hold.
