
Napadayawan ni dati a Presidente Elpidio Quirino gapu iti dakkel a kontribusionna iti pagilian, partikular iti benneg ti edukasion, liderato ken serbisio publiko.
Imbingay ni Michelle A. Adolfo, Officer-in-Charge ti Provincial Tourism Development and Promotion Office dagiti paset ti pakasaritaan ti probinsia ti biag ni Quirino, nga agserserbi a pagwadan ti kinainget, edukasion ken napudno a panagserbi kadagiti umili.
Segun ken ni Adolfo nga idi agtawen iti 16, rinugian ni Quirino ti karerana kas mannursuro iti eskuelaan sakbay a simrek kamaudiananna iti tay-ak ti gobierno ken nagbalin a presidente ti pagilian.
Innayonna pay a dakkel a karit ti panangidaulo ni Quirino gapu iti parikut a sinangona kalpasan ti World War II, a nakaipamaysaan ti administrasionna iti pannakabangon manen ti pagilian, pannakapadur-as ti sektor ti taraken ken pannakaisubli ti talna ken urnos.
Impaganetget pay ni Adolfo a ti kapatgan a tawid ni Quirino ket agtalinaed ti dedikasion iti pagimbagan dagiti Pilipino ken ti panagreggetna a mangbangon manen iti pagilian iti laksid dagiti karit.








