
Winaswas ti Sandiganbayan Fifth Division ti motion for reconsideration nga impila ti kampo ni Senador Jinggoy Estrada kontra iti baro a 90-day preventive suspension mainaig iti mapapati nga iregularidad iti flood control projects.
Segun iti anti-graft court, agsina ken independent dagiti kaso a dengdenggen ti Fifth Division ken Second Division isu a saan a mabalin nga ibilang a doble a panangipataw iti pannusa dagiti dua a suspension order.
Impaganetget met ni Estrada a naiserbinan ti umuna a 90 nga aldaw a suspensionna ken ti baro a pammilin ket mangiyatiddog iti pannakasuspensona iti pakabuklan a 180 nga aldaw.
Sinuportaran ti Office of the Ombudsman ti decision ken inlawlawagna a ti preventive suspension ket maysa nga addang tapno maaywanan ti integridad dagiti trial ken saanna kayat a sawen a napaneknekan a nagbasul ti senador.










