Natay gapu iti pannakalmes ti maysa a baro a napan nagpana iti kabaybayan a paset iti Barangay Sulvec, Narvacan, Ilocos Sur.
Iti pannaki-uman ti Bombo Radyo Vigan ken ni Barangay Captain Paul Asterio Cabasal, adda naawatna a tawag itay alas kuatro singko iti malem, May 11, 2026 maipanggep iti mapapati a saan a panagawid ti maysa a baro a kalugaranna a napan nagpana.
Segun ken ni Cabasal, gapu dayta ket nagpaarayat isuna kadagiti otoridad ken maseknan nga ahensya para iti pannakaisayangkat ti search and rescue operation agingga nasarakanda ti baro.
Naammoan manipod iti nagannak ti baro a saanda nga ammo nga agmaymaysana a napan nagpana ta ti ammoda ket grupoda a napan itay alas syete iti bigat, ngem saandan a napaawid pay.
Naammoan a no agbatok ti baro ket ikkanna iti baton ti bagina tapno saan nga insigida a tumpaw bayat iti panagalana, a mabalin a rason no apay nalmes.
No pay kasta ket indakkelanen ti biktima iti panagpanpana ngem kanayon latta a mabagaan kaduana ti grupona, a no agpanada ket siguradoenda a saan nga agmaymaysa ken rumbeng nga adda kaduada ta no kas bilang adda dagiti saan a nasayaat a mapasamak ket adda mangarayat kadakuada.
