Agtaltalinaed iti ospital ti lalaki a napaltogan iti national highway idiay Quinarayan, Narvacan, Ilocos Sur idi rabii, March 8, 2026.
Ti biktima ket agtawen iti duapulo ket pito, construction worker nga agnaed idiay Barangay Lungog, Narvacan idinto a saan a nabigbig dagiti suspek a nagkalubbon iti motorsiklo.
Iti pannaki-uman ti Bombo Radyo Vigan ken ni PLt. Reynald Ramos iti Narvacan Municipal Police Station, nakaawatda iti tawag manipod Ilocos Sur District Hospital Narvacan a nangipakaammo nga adda iti pasyenteda a biktima iti pammaltog isu nga insigidada a nagresponde.
Segun ken ni Ramos, natalgeden ti kasasaad ti biktima a nagsagaba iti dunor iti bakrangna gapu ta isu ti natamaan iti bala iti paltog.
Iti istorya ti biktima ket bayat nga agaw-awidda ti nobyana idiay Barangay Lungog ket kellaat nga adda nangsaruno kadakuada a nagkalubbon iti kamotorsiklo idi addada pay laeng idiay Barangay Quinarayan ket nakigtotda laengen ta isun ti panangpaltogda kenkuana.
Naammoan a bayat a sarsarunwen ida dagiti suspek ket nakaiddep iti silaw ti motorsikloda tapno saanda a makita ida isu a naklaat laengen idi addadan iti batogda ket maysa kadakuada iti nangipaturong iti paltog ket imputokna iti maminsan a daras a nakapuntaan iti bakrangna.
Nairana a ti nobya ti biktima iti agmanamaneho isu nga idi napasamak iti pammaltog ket inalistoanna iti nagsikko ken siniguradona a saan ida a masurotan dagiti suspek ket nagderetsoda iti ospital a nagpaagas.
Iti agdama ket dukduktalen dagiti otoridad no ania iti motibo iti nasao a pammaltog ken agtultuloy iti panangsapulda kadagiti suspek.
