Tallo ti nadangran iti napasamak a pannakatukbob ti motorsiklo iti traysikel idiay Barangay Calanutian, ili ti Sinait.
Ti Yamaha RS motorcycle ket minaneho ti menor de edad a residente ti Barangay Catayagan, Sta. Lucia, back-rider na ti agtawen ti sangapulo ket siam, residente ti Barangay Pug-os, Sinait, agpada da a saan a nakasuot ti helmet.
Ti met traysikel ket minaneho ti agtawen ti sangapulo ket walo, residente ti Barangay Tapao, Sinait, kalugan na ti agtawen ti sangapulo ket walo, residente ti nadakamat nga ili.
Basar iti imbestigasion, agpada nga agturong iti abagatan a direksion dagiti lugan ket idi magteng da ti nakapasamakan ti insidente, ginandat ti traysikel nga agpakannigid ket dita a natukbob isuna ti motorsiklo.
Nadunor iti agduduma a paset ti bagi dagiti nagkalubbon iti motorsiklo ken ti nakalugan iti traysikel a dagus a naipan da iti balay pagagasan para ti naan-anay a pannakataming da.
