Dead on arrival ti maysa a menor de edad kalpasan iti napasamak nga aksidente a nakairamanan dagiti dua a motorsiklo ken pick-up iti national highway idiay Barangay Margaay, Narvacan, Ilocos Sur.
Ti nagmaneho iti Green Rusi Plus 125 motorcycle ket maysa a lalaki ken kaduana ti putotna a menor de edad nga agpada a saan a nagusar iti helmet.
Ti nagmaneho iti Black Yamaha Aerox motorcycle ket maysa met laeng a lalaki idinto a ti nagmaneho iti Toyota Hilux ket maysa a babai.
Iti pannaki-uman ti Bombo Radyo Vigan ken ni PCpt. Jumar Castro iti Narvacan Municipal Police Station, agpada nga agturong iti bagatan a direksyon ti Rusi motorcycle ken pick-up idinto nga agturong met iti bangir a direksyon ti Aerox.
Segun ken ni Castro, nag-overtake ti Rusi iti pick-up nga adda iti sangwananna ngem isun iti pannakaidungparna iti Aerox a gappuanan iti pannakaibansag dagiti naglugan.
Kinuna ni Castro a naibansag ti Rusi iti pick-up a gappuanan iti pannakagasgas wenno pannakairaman ti nasao a lugan.
Gapu iti impact, nadunor nga agpadpada dagiti naglugan iti Rusi isu a naipanda iti Narvacan District Hospital ngem gapu iti traumatic brain injury secondary to vehicular accident ket saan a nakalasat ti menor de edad.
Ti met nagmaneho iti Aerox ket na-fracture iti sakana isu a naipan met laeng iti Narvacan District Hospital ngem naiyakar ti Northside Doctors Hospital para iti naan-anay a pannakatamingna idinto a ti driver iti pick-up ket saan a naan-ano.
Naammoan a naggapu iti maysa a pasken dagiti agama isu a saan nga ikkaten dagiti otoridad a posible a naka-inom iti arak ti driver ti Rusi idi napasamak iti aksidente.
