Naammoan a naka-inom iti arak ti driver ti motorsiklo idi naaksidente iti Bypass Road idiay Barangay Ayudante, Candon City, Ilocos Sur.
Ti nagmotorsiklo ket maysa a lalaki nga agtawen iti limapulo, agnaed iti Barangay Salvador 1st, Candon City, minanehona ti Blue Raider 150.
Iti pannaki-uman ti Bombo Radyo Vigan ken ni PLt. Jovelyn Antalan iti Candon City Police Station, agawiden ti driver bayat iti panagpapabagatanna a direksyon iti nasao a lugar idin naawanan ti kontrol iti manibelana ket natulid iti kalsada gapu iti mapapati a bartekna.
Segun ken ni Antalan, gapu ti aksidente ket na-fracture iti akin-kannigid nga abaga ti driver ken nadunor iti akin-kannigid a takyag, akin-kannigid a luppo ken sakana ken lower abdomen-na isu a naipaagas iti Ilocos Sur Medical Center ngem naiyakar iti Ilocos Training and Regional Medical Center para iti naan-anay a pannaka-obserbarna.
