Nadunor dagiti nagkalugan iti motorsiklo kalpasan a nakadinnungparda iti maysa a van iti national highway idiay Barangay Nanguneg East, Narvacan, Ilocos Sur idi kalman, May 13, 2026.
Ti nagmaneho iti Hyundai Starex ket lalaki nga agtawen iti duapulo ket maysa, baro, awanan ti trabaho nga agnaed idiay Barangay Camarao, Narvacan ken pasaherona ti maysa a lalaki nga agtawen iti tallopulo ket siam, naasawaan, business owner nga agnaed idiay Barangay BuBon, Burgoz, Ilocos Norte.
Ti nagmaneho met iti Kawasaki Maton ket lalaki nga agtawen iti innem a pulo ket walo, naasawaan, tricycle driver nga agnaed idiay Barangay Bigbiga, Santiago, ken kaduana a babai nga agtawen iti limapulo ket siam, businesswoman nga agnaed idiay Barangay Bigbiga, Santiago.
Naammoan nga agpapabagatan a direksyon dagiti dua a lugan a ti van ket adda iti main lane idinto a ti motorsiklo ket adda iti shoulder lane iti kalsada.
Idi nadanonda iti nasao a lugar kangrunaan iti sangwanan iti ISECO Narvacan, nagsignal nga agpa-kannigid ti van ket simrek iti asideg ti ISECO ngem napaay ti driver ti van a nakakita iti panagdalyasat iti nasao a kalasada ti nakamotorsiklo a gappuanan ti panagdinnungparda.
Agpada a nagsagaba ti minor injuries dagiti nagkalugan iti motorsiklo isu a naipanda iti Ilocos Sur District Hospital – Narvacan babaen kadagiti nagresponde a PNP personnel ken MDRRMO responders para iti pannakatamingda idinto a ti driver ken pasahero ti van ket saan a naan-ano.
