Adda nadiskubre a mapapati a tulang ti tao iti Bell Tower idiay Barangay Sta. Lucia, ili ti Narvacan.
Maysa nga indibidwal ti immuli iti bell tower ket bayat ti iyu-uli na iti agdan ket adda nakitana a maipagarup a tulang ti tao.
Nadiskubre pay iti bell tower ti sando ken checkered short pants.
Rimmuar iti imbestigasion dagiti kapulisan nga adda naireport idi Agosto 27, 2024 a mapukpukaw a tao nga maysa a mental health patient.
Pinasingkedan ti pamilia ti nagpukaw a kapada ti bado ken relo iti inar-aramat ti kabsat-da iti nasarakan iti bell tower.
Nadiskubre pay dagiti otoridad ti maysa a tali iti ngato ti agdan, a mangipakita a mapapati a nagbekkel ti biktima.
Dagiti tulang a nadiskubre ket naipan iti DNA examination tapno mabigbig ti husto nga identidad ti natay bayat nga agtultuloy ti imbestigasion ti Narvacan Municipal Police Station mainaig iti napasamak nga insidente.
