Maysa ti nadunor iti napasamak nga aksidente iti Barangay San Rafael, San Esteban.
Ti nagmaneho ti Yamaha Mio 125 ket agtawen ti tallopulo ket lima, delivery driver ken residente ti Barangay Cappa-Cappa, San Esteban.
Ti met nagmaneho iti closed van truck ket agtawen iti uppat a pulo, truck driver ken residente ti San Nicolas, siudad ti Candon.
Basar iti imbestigasion, agpada nga agpa-abagatan a direksion dagiti lugan a ti motorsiklo ket makin-sango idinto a ti truck ket makin-likod.
Idi nadanonda ti nakapasamakan ti insidente, nagsenyas ken ginandat ti motorsiklo ti agsikko ngem saan a nadlaw ti truck isu a nadungparna ti likod a paset ti motorsiklo.
Gapu dayta, naawanan ti control ti drayber ti motorsiklo ket napa-idda iti kalsada a rason ti pannaka-dunor na.
Dagus a naitaray ti drayber ti motorsiklo iti balay pagagasan para ti naan-anay a pannakatamingna kabayatan a saan a naan-ano ti nagmaneho ti truck.
