Dati a susik iti rason iti panangbagkong ti maysa a lalaki iti kabsatna idiay Barangay Iboy, San Ildefonso, Ilocos Sur itay alas sais singkwenta iti rabii, May 5, 2026.
Ti biktima ket lalaki nga agtawen iti tallopulo ket siam, ken addaan ti live-in partner; idinto a ti suspek ket ti adingna a lalaki, baro, construction worker nga agpada nga agnaed iti nasao a lugar.
Nakaawat ti San Ildefonso Municipal Police Station ti pakaammo maipanggep ti napasamak a pammagkong iti nasao a lugar isu a nagrespondeda ket nakitada a nagsagaba ti biktima iti visible stab wound iti akin-kannigid a paset iti takyagna.
Naammoan a nagtaud iti pammagkong iti daan a susik gapu iti dati a trabahoda.
Nadiskubre met ti naaramat iti pammagkong a 3-inch pointed metal object nga insuko ti Barangay Kapitan a ni Mark Anthony Pagud nga isu iti nanganawa kadagiti dua.
Insigida met a nakemmeg ti suspek babaen kadagiti nagresponde a polis idinto a ti nadunor a biktima ket naipan iti San Ildefonso Rural Health Unit (RHU) para iti initial medical assistance ken insigida a naiyakar iti Ilocos Sur District Hospital, Magsingal para iti naan-anay a pannakatamingna.
