Sinigurado ti Department of Health (DOH) nga awan ti nairekord a kaso iti hantavirus iti Pilipinas ken natalged dagiti tallopulo ket walo a Filipino crew iti maysa a luxury cruise ship idiay Atlantic Ocean a naireport a mapapati nga adda outbreak.
Segun ken ni DOH Undersecretary Albert Domingo, nakasangladen ti nasao a barko iti MV Hondius ken naidalan iti quarantine.
Bambantayanda pay iti sitwasyon kasaruno iti bilin ni Pres. Ferdinand Marcos Jr.
Kinuna ni Domingo nga awan ti sakit dagiti nasao a Filipino crew kas pinasingkedan ti World Health Organization.
Iti pakaammo ket tallo iti natay iti nasao a barko, maysa iti kritikal iti kasasaadna ken dua pay a crew iti nakitaan iti nakaru a sintomas.
Kabayatanna, impaganetget ti DOH a nababa ti pangta ti hantavirus iti pagilian.
