Agpada a nadunor dagiti dua a nagkalugan iti motorsiklo ta nakadinungparda ti maysa nga ambulansya iti Quirino Blvd., corner Florentino St. Barangay II. Vigan City, Ilocos Sur.
Ti nagmaneho ti puraw nga ambulansya nga adda MV File-na ket lalaki nga agtawen iti uppat a pulo ket siam, ambulance driver nga agnaed idiay Barangay Ora West, Bantay.
Ti met nagmaneho iti Yamaha NMax motorcycle ket lalaki nga agtawen iti sangapulo ket siam, kaduana ti maysa met laeng a lalaki nga agtawen iti sangapulo ket siam nga agpada a taga-Puro, Magsingal.
Agpapa-amianan a direksyon ti ambulansya iti Quirino Blvd idinto nga agpapadaya a direksyon iti Florentino Street iti motorsiklo idin nadanonda iti nasao a lugar ket saanda a naliklikan a nagdinnungpar iti tengnga iti intersection.
Ti nagmaneho ken bakride iti motorsiklo ket nagsagaba iti dunor iti agduduma a paset ti bagida idinto a ti nagmaneho iti ambulansya ket nakarikna iti discomfort iti barukongna isu nga agpapada da a naipan iti Ilocos Sur Provincial Hospital-Gabriela Silang para iti medical attention.
Naammoan nga agpada nga adda impluwensya iti arak ti nagkalugan iti motorsiklo idi napasamak iti aksidente.
