Target ti voucher program iti salinong ti Senate Bill No. 1981 a tulongan amin a “disadvantaged learners” a makaadal iti pribado a pagadalan babaen ti voucher program system.
Segun kada Senador Alan Peter Cayetano ken Win Gatchalian, dakel ti maitulong ti gakat kadagiti disadvantaged learners.
Kinunada a kangrunaan a nakatuding iti gakat nga umun-una a matulongan ti disadvantaged learners kas ti persons with disabilities (PWDs), naulila, adda iti nasulinek a lugar, Indigenous People, ken benepisyo iti Pantawid Pamilyang Pilipino Program (4Ps).
Immunan a pinasingkedan ni Senador Bam Aquino ti pannakapasa ti gakat iti botos a duapulo ket dua a pabor ken awan iti nanglapped babaen iti panangpatibker iti Senate Bill No. 1981 wenno gakat a Basic Education Voucher Program Act.
Ti kangrunaan nga author ken co-sponsor ni Sen. Gatchalian iti gakat ket naggapu iti Senate Bill No. 422 ni Cayetano, wenno ti The Learner’s Choice (TLC) Act of 2025, a gagem nga ikkan ti subsidiya dagiti kualipikado nga agad-adal tapno makastrek iti sadinoman a DepEd-recognized private school babaen ti maysa a voucher.
