Suportado ni House Speaker Faustino “Bojie” Dy III iti panawagan ni Presidente Ferdinand Marcos Jr. para iti maysa nga special session ti Kongreso inton Hunyo 17.
Daytoy ket tapno leppasen dagiti naitantan a gakat a naka-pokus kadagiti pamilia a Pilipino.
Segun ken ni Dy, nakasagana ti Kamara a sumungbat iti Proclamation No. 1318 ti presidente.
Inlawlawag na nga amin a priyoridad a linteg a nadakamat iti proklamasyon ket naaprobaranen ti House of Representatives sakbay pay da a nag-adjourn idi Hunyo 3.
Karaman iti maisingsingasing a linteg ti Anti-Political Dynasty Law, National Center for Geriatric Health Act, panang-amyendar iti GASTPE ken Pantawid Pamilyang Pilipino Program (4Ps), kasta met ti Assistance to Individuals in Crisis Situation (AICS) Act.
Gagem dagituy a papigsaen ti proteksion iti komunidad, edukasyon, ken salun-at iti pagilian.
