Pinasingkedan ti Department of Social Welfare and Development (DSWD) a nagun-odna iti maysa a pakasaritaan a paset iti panangpapigsa ti Pantawid Pamilyang Pilipino Program (4Ps) kalpasan nga inaprubaran ti Department of Budget and Management (DBM) ti napasayaat nga organizational structure-da ken 5,703 a posisyon.
Naammoan iti DSWD a ti panagaprubar ti DBM ket maibilang a maysa kadagiti kapatgan nga institutional reform para iti kangrunaan a programa iti pagilian iti social protection manipod nagbalin a linteg ti Republic Act 11310, a mang-institutionalize iti 4Ps idi 2019.
Sakup iti napasayaat nga organizational structure ti panangpatibker ti 4Ps Bureau, ti panagpartuat kadagiti nakadeploy a 4Ps Division iti amin a DSWD Field Office- pakairamanan ti baro a naidatag a Negros Island Region ken ti panagaprubar ti posisyon a mangpatibker iti panangidaulo ti programa ken panangipaay iti serbisyo iti intero a pagilian.
Iti salinong ti naaprubaran nga structure, nagpartuat ti 5,627 a posisyon para iti amin a DSWD Field Office iti intero a pagilian.
