Agpada a nadunor dagiti nagkalubbon iti motorsiklo kalpasan ti aksidente a napasamak idiay along national highway sakupen ti Barangay Bahet, ili ti San Ildefonso.
Ti nagmaneho ti red Honda city ket agtawen ti uppat a pulo ket uppat, naasawaan ken residente ti Barangay Pudoc Sur ili ti San Vicente.
Ti met nagmaneho ti Rusi 150 motorcycle ket agtawen ti innem a pulo ket maysa, kalubbon na ti agtawen innem a pulo, agpada a residente ti Barangay Kakadiran, Cabugao.
Basar iti imbestigasion, ti Honda city ket agturong iti amianan a direksion ket idi nagteng na ti nakapasamakan ti insidente, ginandat ti drayber nga agsikko nga agpa-kannigid.
Ket idi agsikko ti Honda city, aksidente a nagdinnungpar da iti motorsiklo nga agturong iti abagatan a direksion.
Agpada a nadunor dagiti nagkalubbon iti motorsiklo a dagus a naipan iti balay pagagasan para ti naan-anay a pannakatamingda idinto a saan a naan-ano ti drayber ti Honda city.
