Binilin ni Pres. Ferdinand Marcos Jr. ni Agriculture Secretary Francisco Tiu Laurel Jr. a mangipatungpal kadagiti addang tapno mailaklaka iti presyo ti bagas bayat nga agar-aramid iti wagas iti gobierno tapno salakniban dagiti umili manipod iti nangina a presyo dagiti taraon.
Ti bilin ket inaramid ti presidente bayat ti UPLIFT meeting idiay Malakanyang a nakatrataran dagiti addang tapno mapatibker ti presyo dagiti magatang ken masigurado nga umdas iti suplay.
Segun ken ni Palace Press Officer Atty. Claire Castro, nainget ti bilin ni Pres. Marcos ken ni Laurel nga aramiden amin a wagas tapno laeng mailaklaka iti presyo iti bagas ken masalakniban ti pagsayaatan dagiti umili ken mapatibker iti ekonomia iti pagilian.
Kinunana pay a mabalin nga agpataw ti price cap kadagiti imported a bagas tapno saan unay a marigatan dagiti consumer.
Imbilin pay ti presidente kadagiti gabinete a tignayan dagiti hoarder ken agar-aramid iti profiteering iti baet ti mapaspasaran a krisis.
