Bimmaba ti inflation iti taraon para kadagiti nakurapay a 30 porsiento iti populasion dagiti Pilipino agingga iti 9.4 a porsiento ita nga Oktubre, manipud iti 9.8 a porsiento idi Setiembre, segun iti Philippine Statistics Authority wenno PSA.
Nakatulong ti panagbaba ti presio dagiti ikan, nateng ken sumagmamano a klase ti lana, nupay agtalinaed a nangato ti presio ti bagas ken sumagmamano a kangrunaan a taraon kas iti mais, prutas ken tinapay.
Segun kenni Agriculture Secretary Francisco Tiu Laurel Jr., palawaen ti gobierno dagiti programa ken tulong pinansyal, pakairamanan ti crude oil subsidy ken toll fees ken programa ti Benteng Bigas para kadagiti senior citizens, single parents ken persons with disabilities wenno PWD.
Impaganetget ti sekretario a malaksid iti pannakapababa ti presio dagiti tagilako, napateg met ti panangsuporta kadagiti mannalon tapno mataginayon ti umdas a suplay ti taraon iti laksid ti epekto ti panagbalbaliw ti klima ken krisis kadagiti dadduma a pagilian.
