Indonar ti United States government ti sabali pay a P13.8 million a tulong kadagiti tattao a nadisplace gapu ti tallo a bagyo ken southwest monsoon iti Luzon idi napan a bulan.
Ti pondo ket gagem a maipaay ti emergency shelter assistance ken hygiene kits iti nasurok 3,000 a pamilia wenno 15,800 a tattao nga agtaltalinaed iti evacuation centers idiay Bulacan, Laguna, Pampanga ken Rizal.
Ti nayon a tulong ket nangitunda ti P27.6 million a total amount ti US humanitarian support para ti disaster response efforts iti Pilipinas ita a tawen.
Babaen ti tulong ket mabalinen a mangipaay ti International Organization for Migration (IOM) ken ti Department of Social Welfare and Development (DSWD0 iti shelter-grade tarpaulins, repair kits ken essential household supplies kadagiti pamilia a naawanan ti pagtaengan bayat ti panagduprak iti Bagyo Crising, Dante ken Emong kasta payen ti monsoon.
Segun ti US Embassy, tunggal shelter repair kit ket addaan ti basic construction tools ken materials a mabalin a pakaaramatan dagiti pamilia nga agpasimpa iti pagtaenganda.
Tapno mayetnag ti salun-at ken sanitation karamanen ti panangpasayaat ti kasasaad dagiti evacuee iti evacuation centers ket naipaayanda ti sabon, buckets ken cleaning supplies.
