Agtultuloy iti livelihood program iti Tagudin Municipal Jail kangrunaan iti panagaramid iti Bayong ken Eco-bag making projects.
Iti pannaki-uman ti Bombo Radyo Vigan ken ni JInsp. Rafael Ornido Jr., ti panagaramid ti bayong ket naaramid iti local wenno eco-friendly materials a mabalin a pagusar, pagidulinan wenno kanayon a maaramat.
Segun ken ni Ornido, ti met eco-bag printing ket personalized ecobag printing nga adda disenyo ti logo iti Tagudin Municipal Jail a mabalin a maaramat iti inaldaw-aldaw.
Inlawlawagna a ti nasao a programa ket makatulong iti panangipakita iti kinasirib, praktikal a kabaelan ken entrepreneurship bayat iti panangsalaknib iti aglawlaw babaen iti reusable products.
Dakkel a tulong dayta kadagiti PDLs para iti baro a pagsapulan ken agtalek iti bagida; kasta payen kadagiti aggatang ta makatulongda iti aglawlaw.
Kabayatanna, pinasingkedan ni Jail Officer 1 Lherman Picar a dakkel a tulong ti nasao a programa para iti pamilia dagiti PDL.
Imaganetgetna iti suportar nga ipaay iti Local Government iti Tagudin para iti pagsayaatan dagiti PDL isu a pagyamananna iti dayta.
