Pinainget ti Department of Social Welfare and Development (DSWD) ti pannakikammayetda iti transport network companies (TNCs) para iti sumaruno a rollout iti cash assistance iti transport ken delivery drivers a nakaituding inton May 13, 2026.
Segun ken ni DSWD Secretary Rex Gatchalian, nabilin dagiti kompania nga agipasa iti final payout plans-da pakairamanan ti venues ken schedule idi kalman kas panagsagana ken distribusyon.
Tapno maliklikan ti panagdudupudop, nalimitaran ti payout iti nasurok-kumurang 10,000 a benepisyaryo kada aldaw a maipatungpal babaen ti staggered scheduling depende iti kinaadu ti drivers iti tunggal kompania.
Iti salinong ti tulagan, ti DSWD ti mangidaulo ti distribusyon iti pondo babaen dagiti paymaster idinto ti TNCs ti makaammo iti logistics kas ti panagpili iti lugar, panangsimpa iti schedule ken koordinasyon kadagti driver.
Impaganetget ni Gatchalian a rumbeng a naak-aktibo dagiti kompania iti proseso imbes a mangnamnama laeng iti gobierno.
