Binilin ni Pres. Ferdinand Marcos Jr. ti Department of Social Welfare and Development (DSWD) nga agipatulod nga insigida iti tulong kadagiti residente idiay Camalig, Albay a naapektaran ti panagpuswak iti napuskol a dapo iti Bulkang Mayon.
Kayat a masigurado ti presidente nga adda umanay a taraon ken suportar kadagiti apektado babaen ti ready-to-eat food packs iti DSWD.
Nakatutok ti presidente iti paspasamak idiay Camalig, Albay, a kaaddoan a residente ket nagbakwit manipod pagtaenganda gapu iti napigsa a panagpuswak iti dapo manipod iti ngiwat iti bulkan.
Maibasar iti pakaammo ti DSWD Field Office 5-Bicol Region, nakaiteddan iti 393 ready-to-eat food boxes kadagiti residente iti Barangay Anoling itay parbangon kalpasan a nagbakwitda manipod kadagiti pagtaenganda.
Kayat a siguradoen ti presidente nga amin nga apektado a residente ket matulongan iti baet nga agtultuloy iti panag-alburuto iti Bulkang Mayon.
