Mapatta-patta nga umabot iti 19,729 iti nairekord a reklamo nga indanon iti publiko iti Sumbong sa Pangulo website a nailatang para kadagiti reklamo nga adda pakainaugan ti maanomalya a flood control projects.
Segun ken ni Presidential Communications Office Undersecretary ken Palace Press Officer Claire Castro, manamnama ita nga aldaw iti ad-adu nga impormasyon maipanggep ti development kadagiti reklamo ken nu ania dagiti natignayanen ken nasolbar.
Kinuna ni Castro nga awan pay iti maibagada a timeline nu agingga kaano a nakalukat iti website.
Immunan a pinasingkedan ti malakanyang a silulukatda iti panangyatiddog ti website para kadagiti reklamo kontra iti anomaly iti agduduma nga infrastructure projects iti gobierno.
Maipalagip nga idi August 11, 2025 ket nairusat ti Sumbong sa Pangulo website kagiddan ti pannakaibutaktak ti top 15 contractors a karaman iti flood control anomaly.
