Binilin ni President Ferdinand Marcos Jr. iti Department of Health nga ikampania iti nasalsalun-at a food options tapno matignayan ti malnutrisyon ken stunting kadagiti ubbing.
Ti addang ket imbilin ni Marcos bayat ti pannakitaripnongna kadagiti opisyal iti DOH ken dadduma pay a concerned agencies tapno pagpatangan ti stratehiya, inisyatiba, karit ken wagas tapno maipatungpal ti First 1,000 Day program iti DOH.
Segun ken ni Marcos, masapul a maadalan dagiti umili iti panagkaan iti nasalun-at a taraon.
Kayat pay ti presidente nga agpokus ti DOH iti 34 Philippine Plan for Action for Nutrition (PPAN) a maipangruna kadagiti nangato ti kasona ti stunting ken malnutrition.
Karaman ti priority areas iti Luzon idiay Pangasinan, Isabela, Bulacan, Nueva Ecija, Pampanga, Quezon, Cavite, Rizal, Palawan, Oriental Mindoro, Masbate, Camarines Sur, ken Sorsogon.
Idiay Visayas ket idiay Negros Occidental, Iloilo, Antique, Negros Oriental, Cebu, Leyte, Samar, Eastern Samar, ken Northern Samar idinto nga idiay Mindanao ket idiay Zamboanga del Norte, Zamboanga del Sur, Zamboanga Sibugay, Lanao del Norte, Bukidnon, Davao del Sur, Cotabato, Surigao del Sur, BARMM, Sulu, Basilan, Maguindanao, ken Tawi-Tawi.
