Tallo iti nadunor iti pannakatukbob ti maysa a motorsiklo ti sarsarunwenna a traysikel idiay Barangay Poblacion, Sta. Maria, Ilocos Sur iti alas tres kuarenta iti malem idi kalman, July 1, 2025.
Ti nagmanmeho ti traysikel ket agnaed idiay Sta. Maria idinto a ti nagmaneho ti Yamaha Mio ket maysa a menor de edad kaduana ti kalugaranna manipod Narvacan.
Iti pannaki-uman ti Bombo Radyo Vigan ken ni PLt. Jenson Refuerzo a Deputy Chief of Police iti Sta. Maria Municipal Police Station, agpapaammianan a direksyon ti traysikel idin nadanonna iti paset ti national highway ket nagsikko ngem isu metten iti panangtukbob iti nakamotorsiklo a gappuanan iti aksidente.
Segun ken ni Refuerzo, nadunor iti ulo ken nadumaduma a paset ti bagi ti drayber ti motorsiklo idinto nga agpada a nagasgasan laeng ti backride ti motorsiklo ken ti drayber ti traysikel nga agpapada a naipan iti ospital para iti pannakatamingda.
Iti agdama ket agtaltalinaed nga adda iti ospital ti driver ti motorsiklo gapu iti sinagabana a dunor iti ulo ta naammoan a saan a nakasuot ti helmet idi napasamak iti aksidente.
Nupay kasta ket awan pay iti inisyal a nagsaritaan dagiti karaman iti aksidente para iti pannakasolbar iti nasao a pasamak.
VIDEO – PLT. JENSON REFUERZO
