VIGAN CITY- Patien ni Senate Committee on Health Chairman Senador JV Ejercito a nagkikinnunsabos dagiti sumagmamano nga opisyal ti Department of Health ken ti contractor a JBros. Construction Corporation isu a maanomalya ken pimmalpak ti barangay health station project ti DOH a napondoan iti 8.1 bilyon a pisos.
Ti ekslusibo a pannaki-uman ti Bombo Radyo Vigan ken ni Sen. Ejercito, pinabasol na dagiti sumagmamano nga opisyal ti DOH a kinatulag da ti contractor tapno ireport da a kumpleto ti proyekto uray no saan pay tapno makasingir da.
Naduktalan iti report a manipud iti lima ribo pito gasut a target ti DOH a barangay health stations ket uppat a gasut pito pulo laeng dagiti nalpas isu a mapatta-patta a maysa a bilyon a pisos laeng ti nagastos a pondo.
Patien pay ti senador a pimmalpak ti proyekto agsipud ta saan a nakasagana ti DOH ken nagkurang da iti impelementasyon isu a nasayang laeng ti pondo tapno maikkan kuma ti primary health care dagiti amin nga umili nangruna dagiti agnanaed iti nasusulinek a lugar.
Plano met ti senado a paayaban ni dati a budget secretary Butch Abad agsipud ta ti pondo para iti programa ket naala iti savings ti DOH a saan nga inapprubaran ti Kongreso ken saan a karaman iti national budget.
