Awan ti pakainaigan ti takder iti gobierno iti Pilipinas idiay West Philippine Sea (WPS) iti isyu ti pulitika wenno mapapati a “publicity stunts”.
Dayta iti sungbat ti Philippine Coast Guard (PCG) kalpasan a kwestyonaran ni Chinese Embassy Deputy Spokesperson Guo Wei ti naaramid a maritime domain awareness flight idiay West Philippine Sea a nakipasetan iti dadduma a personalidad ken media.
Inawagan ti embahada a publicity stunt laeng iti panagpatrolya ken maar-aramat para iti domestic politics.
Ngem segun ken ni PCG Spokesperson for the West Philippine Sea Rear Admiral Jay Tarriela, ti China mismo iti nabayagen nga agar-aramat ti pulitika iti Pilipinas maipanggep iti patangan iti teritoryo.
Impatangken ni Tarriela a lehitimo ti insayangkatda a panagpatrolya ken awan ti rason tapno agkiddaw ti pammalubos iti Beijing iti panangisayangkat kadagiti operasyon iti uneg iti exclusive economic zone (EEZ).
Impaganetget ti opisyal a ti militarisasyon iti China, reclamation activities ken panag-harass-da kadagiti barko ken aircraft iti Pilipinas ti pudno a mangpakaru ti tensyon ket saan a ti panagpatrolyada.
