Nakasagana ti legal defense ni dati a Pres. Rodrigo Duterte para ti confirmation of charges hearing iti International Criminal Court (ICC) a nakaituding a mangrugi inton September 23, 2025.
Maibasar iti dokumento a naipasa iti Pre-Trial Chamber I idi August 22, kinuna ni Nicholas Kaufman a mangilatangda iti sag-tallopulo a minutos para iti opening ken closing statements, idinto a tallo agingga uppat nga oras met iti nakailatang para ti oral presentation iti depensar.
Ti panagdenggeg ket paset ti proseso tapno mabigbig nu adda umanay nga ebidensya tapno ituloy ti proceedings kontra ken ni Duterte mainaig kadagiti alegasyon ti crimes against humanity nga adda kainaigan iti kontroberyal a kampania kontra iti illegal a droga.
Nasurok 7,000 a tattao iti natay iti operasyon manipod 2016 agingga 2019, numan pay posible a mapatta-patta a 30,000 iti actual a bilang kas kinuna dagiti human rights groups.
Impaganetget ni Kaufman a saaan a nagaramid iti aniaman a krimen ni Duterte ket nagserbi iti pagilian a napudno ken maipannakkel iti uneg iti mano a tawen.
Namnamaen ti kampona a tutuokan ti depensa dagiti legal nga argumento mainaig ti jurisdiction iti ICC, ti panagbalin a mapapati a “politically motivated” ti kaso ken kinaawan ti direkta a kammayet ni Duterte kadagiti pammapatay.
Maipalagip a nakemmeg ni Duterte iti Pilipinas idi March 11, 2025 kas maibasar ti warrant of arrest nga inruar ti ICC, nga agdaman a nakabalud iti Scheveningen Prison idiay The Hague.
