Nangipila ni Sen. Bato dela Rosa ti dua a gakat iti baet a panagliwayna iti Senado.
Maibasar ti rekord iti Senado, karaman ti gakat a pinirmaan ni Dela Rosa ket ti Proposed Senate Bill No. 2080 wenno ti Counter Foreign Interference Act a mangdusa iti pannakibiang dagiti gangannaet a pagilian a naipila idi Lunes kagiddan ti panagsubli ti session iti Senado kalpasan iti makabulan a recess.
Impilana pay ti Senate Bill No. 2079 wenno ti National Police Clearance System Act a gagem a papigsaen ti operationalization iti sistema pakairamanan iti panangpatalinaed ti centralized record iti amin a naireport a crime incidents, warrants of arrest, dagiti ladawan ken personalized details dagiti nakemmeg ken wanted persons.
Maipalagip a manipod idi November 2025 ket saan pay a nagpakita iti publiko ni Sen. Dela Rosa ken saan a dumardar-ay iti session iti Senado iti baet ti mapapati a panagiruar ti International Criminal Court (ICC) ti arrest warrant kontra kenkuana maipanggep iti kontrobersyal a war on drugs.
Sumangsango pay ti Senador iti ethics complaint gapu iti nabayag a panagliwayna iti Senado.
