Agtultuloy iti imbestigasyon dagiti otoridad maipanggep iti napasamak nga uram iti garahe iti Baquiran Funeral Homes idiay Barangay Vacunero, Sto. Domingo, Ilocos Sur a nakatayan ti maysa a Persons with Disability.
Iti pannaki-uman ti Bombo Radyo Vigan ken ni SFO1 Randulf Pescador a Chief iti Investigation and Intelligence Unit iti Bureau of Fire Protection –Sto. Domingo, ti biktima ket maysa a babai a saan a makapagna ken saan a makasao a napanawan a maymaysa iti uneg iti quarter iti caretaker ta napan nagtrabaho ti kabsatna a lalaki idinto a rimmuar met ti inana.
Segun ken ni Pescador, gapu iti kapigsa iti uram idi nagrespondeda ket inyun-unada a tinurong iti lugar nga ibagbaga dagiti tattao nga ayan ti PWD ngem iti baet a pinadasda nga isarbar ti biktima ket saanen a nakalasat pay.
Agtultuloy iti imbestigasyon iti nasao a pasamak ngem addan ti sursuroten a pattern dagiti otoridad ta inikkandan iti posible nga electrical iti nagtaudan iti uram gapu ta awan ti kuryente iti 1st District iti Ilocos Sur itattay, May 7, 2026.
Kabayatanna, mapatta-patta a P180,000 iti gatad ti nadadael gapu iti uram ta naammoan a kaaddoan nga adda iti lugar idi napasamak iti insidente ket dagiti plastic, karton ken nadaras laeng a mauram a materyales.
