Nakemeg ti maysa a lalaki nga agtawen iti limapulo ket uppat, naasawaan, dati nga Overseas Filipino worker nga agnaed idiay Barangay Vacunero, Sto. Domingo, Ilocos Sur iti naisayangkat a buy bust operation dagiti otoridad.
Iti pannaki-uman ti Bombo Radyo Vigan ken ni PLt. Roger Retreta nga Officer-in-Charge iti Sto. Domingo Municipal Police Station, newly identified ti suspek nga agar-aramat ken agilaklako iti shabu.
Segun ken ni Retreta, nagilako ti suspek iti shabu nga aggatad ti sangaribo a pisos iti polis a nagpammarang a buyer a gappuanan ti pannakakemmegna.
Naala manipod ti suspek iti nasurok-kumurang tallo a gramo iti mapapati a shabu nga aggatad ti P21,000 a naipan iti lima a piraso iti heat sealed transparent plastic sachets.
Naala pay ti non-drug evidence a maysa a piraso ti genuine P1,000; duapulo ket siam a piraso iti P1,000; lima a piraso iti P500; lima a piraso iti P100; maysa a P50; dua nga android cellphone, maysa a Rusi DeltaX 125 motorcycle; maysa a black sling bag; ken maysa a pakete iti sigarilyo.
Balakad ni Retreta kadagiti agar-aramat ken agilaklako iti illegal a droga nga isardengdan iti madi nga aramidda ket impasiguradona nga agtultuloy iti pananglabanda para iti pannakaparmek iti nasao nga aramid.
VIDEO – PLT. ROGER RETRETA
