Insingasing ti PAG-Ibig Fund, katinnulongda ti Commission on Higher Education ti panangpalawa iti nalaka a rental housing para kadagiti state universities and colleges iti intero a pagilian babaen iti proyekto a Project BALAY: Bridging Access to Learning.
Iti maysa a taripnong iti CHED Auditorium idiay Quezon City idi Abril 15, natratar ti plano a mangted iti accessible a pabalay para kadagiti mangisursuro, estudiante, ken non-teaching personnel dagiti SUC.
Impresenta ti PAG-IBIG Fund ti Rental Housing Construction Loan program a mangidiaya iti subsidized interest rate a 3 percent kada tawen iti umuna a 10 a tawen, nga adda agingga 30 a tawen a matinnagan.
Adda met nailatang a P6.3 billion para iti panangipatakder iti dormitoryo ken rental housing iti ueg wenno asideg kadagiti campus.
Segun iti PAGIBG, napagpatangan iti taripnong kadua dagiti nasurok 30 nga SUC dagiti praktikal ken sustainable a housing solution a nadisenio tapno masungbatan ti pagkasapulan iti academic community.
