Dua iti nadunor iti aksidente a nakairamanan ti maysa a motorsiklo ken kurong-kurong iti national highway idiay Barangay Balaleng, Bantay, Ilocos Sur idi kalman, April14, 2026.
Ti nagmaneho iti black Yamaha NMax ket lalaki nga agtawen iti innem a pulo ket tallo, naasawaan, negosyante nga agnaed idiay Barangay Bulala Centro, Vigan City.
Ti nagmaneho met iti Motoposh Pinoy125 tricycle wenno kurong-kurong ket lalaki nga agtawen iti tallopulo ket dua, naasawaan; kaduana ti maysa a lalaki, agtawen iti tallopulo ket lima, agpada nga ice cream vendor ken agnaed idiay Barangay Balaleng Laudenia, Bantay.
Agpada nga agpapabagatan a direksyon dagiti dua a lugan idin nagsardeng ti nakamotorsiklo ti western portion iti kalsada ken nagsikk iti kannigid ngem bayat dayta ket nadungpar iti sumungad a kurong-kurong a napaspas iti patarayna.
Natumba ti driver ti motorsiklo a gappuanan ti pannakadundunor iti akin-kannigid a sakana isu a naipaagas iti ospital.
Saan met a naan-ano ti driver ti kurong-kurong ngem naipan iti ospital para ti medical evaluation idinto a ti kaduana ket nagsagaba ti head injury isu a naipan iti ospital para iti pannakatamingna.
Naammoan a ti driver ken pasahero ti kurong-kurong ket naka-inom iti arak idi napasamak iti aksidente.
