VIGAN CITY- Imimbestigaran dagiti pannakabagi ti linteg no ti naduktalan da a kubo idiay Brgy. Kaliwakiw, Salcedo ket kuta dagiti armado a grupo wenno grupo dagiti drug personality nga agop-operate ditoy probinsya ken kadagiti kabangibang a lugar.
Maibasar iti report, naala dagiti kameng ti Ilocos Sur Police Provincial Office (ISPPO) ken Regional Mobile Force Batallion iti kubo ti 74 a piraso ti plactic pack a naglaon ti “white crystalline substance” nga agdagsen iti 25,690 a gramo; uppat a plastic container; maysa nga unit ti air pump; campaign materials para iti maysa a “Joke Arroyo” ken “Carino” ken dadduma pay a gamit.
Malaksid iti dayta ket naala pay dagiti otoridad ti hand pump water supply, nadadael a banyo, clay stove ken nausar a wire.
Iti agdama ket addan iti kustodya ti Philippine Drug Enforcement Agency (PDEA) dagiti banag a naala iti nasao a kubo.
