Kiniddaw ni Manila 2nd District Representative Rolando Valeriano iti Commission on Audit (COA) ken Anti-Red Tape Authority (ARTA) a mangisayangkat iti agsina wenno agtipon nga special audit iti Philippine Health Insurance Corporation wenno PhilHealth.
Daytoy ket tapno maammuan no apay a maliwayan ti PhilHealth dagiti remittances-na kadagiti ospital ken database management.
Para ken ni Valeriano, dagiti natakuatan iti 2023 audited financial statements ti PhilHealth ket umdasen a pangibasaran ti COA ken ARTA a mangisayangkat iti naun-uneg nga audit.
Dagiti kangrunaan a ma-audit ket ti saan a kompleto ken saan nga usto nga entry ti nasurok 1.3 million a benepisyaryo a rason iti double enrollment iti PhilHealth Members Information System.
Dinakamat pay ni Valeriano ti duplicate ken multiple entries iti nasurok 266,000 a senior citizen members a katukad ti P1.333-B subsidy ken ti pannakairaman ti nasurok 4,000 a pimmusay a senior citizen members database ken billings.
Binabalaw pay ni Valeriano ti kaawan ti policy ti PhilHealth iti premium contributions ken expanded benefits para kadagiti single parents ken persons with disabilities (PWDs) isu a saan a maited kadakuada dagiti benepisio nga ibilin ti linteg.
