Patien ti maysa a graduate ti University of Northern Philippines a Top 6 iti Pyschometrician Licensure Examination a saan a nasken a ti panagdudua iti bagi ti manglapped iti panagballigi iti biag.
Iti pannaki-uman ti Bombo Radyo Vigan ken ni Marianne Michelle Pardo, dakkel a tulong ti panagsagana ken panagpammati iti Dios tapno magun-od dagiti arapaap.
Mamati ni Pardo a saanto pulos a mangpaay ti panagsalukag iti biag ta kas kenkuana ket binabalawna met laeng idi ti bagina ngem intultuloyna latta ti nag-review.
Imbingayna a pudno nga arapaapna idi ti mairaman kadagiti agbalin a topnotcher ken uray laeng makastrek koma iti maikasangapulo a puesto ngem nakigtot idi madamagna nga adda isuna iti maikanem a puesto.
Kalpasan ti lima tawenna iti kolehio ken ti pannakairuarna ti board-nan, planona pay laeng ti aginana ngem no adda dumteng a gundaway kenkuana a makapagtrabaho no la ketdi kabaelanna ket saanna a pagkedkedan.
Kabayatanna, pinagyamananna met dagiti amin a nangsuporta kenkuana nangruna ti inana.
