
Inawat ni Senador Risa Hontiveros ti desision ti Korte Suprema a mangideklarar a maikontra iti konstitusion ti bond requirement iti babaen ti Magna Carta dagiti Filipino Seafarers.
Segun ken ni Hontiveros, saan a nainkalintegan nga obligaren dagiti seafarers a nangabaken iti labor case-da nga ag-shell out iti kanayunan a kuarta tapno magun-odda ti naited a compensation bayat a mayur-uray ti apela.
Idi Nobiembre 16, indeklarar ti Korte Suprema En Banc a saan a maitunos iti konstitusion ti Section 59 ti Republic Act No. 12021 a mangikalikagum kadagiti seafarers iti bond sakbay a maipatungpal ti compensation ken danyos-da.
Nagyaman ti senador kadagiti seafarer ken ti sektor a nangidatag iti panagkedked iti kastuy a probision.
Impasiguradona pay nga agtultuloy ti pannakaitandudo ti karbengan ken pagimbagan dagiti seafarer ken dadduma pay a mangmangged a Pilipino.










