Ipaayan ti gobierno iti tulong pinansial dagiti nadunor ken pamilia dagiti natay iti pammaltog idiay Banga National High School iti South Cotabato idi napalabas.
Kasaruno daytoy ti pammilin ni Presidente Ferdinand Marcos Jr ken ni Executive Secretary Ralph Recto a siguradwen a maited nga insigida dagiti kasapulan a tulong kadagiti biktima ti pammaltog.
Pinagtignay met ni Secretary Ralph Recto ti Office of the Deputy Executive Secretary for Finance and Administration para iti alisto a proseso ken panangiruar iti tulong pinansial kas maisurot iti linteg ken patakaran.
Karaman iti pammilin ti panangipasa iti progress report iti uneg ti lima nga aldaw ken dagiti sumaruno nga aldaw agingga makompleto ti panangted iti tulong.
Segun iti Malakanyang, immuna a naipaay ti tulong ti Department of Social Welfare and Development kadagiti apektado a pamilia agraman ti psychological first aid kadagiti mangisursuro ti Banga National High School kas paset iti panangtaming ti gobierno iti insidente.
