Nagyaman ti Ilocos Sur Provincial Sports Coordinator kadagiti amin a simmuportar kadagiti atleta a nakipaset iti 2024 Batang Pinoy.
Iti pannaki-uman ti Bombo Radyo Vigan ken ni Jonathan Pugrad a Provincial Sports Coordinator, napalaus iti panagyamanna kadagiti amin nga atleta iti panangibagida iti probinsia, kadagiti coach a nangisuro kadagiti participant para iti napintas a performance-da, ken amin a timmulong kadagiti atleta.
Segun ken ni Pugrad, sinaganaanda iti pannakisali dagiti atleta ta makabulan iti insayangkatda a panagsanay, at-atiddog ngem idi kallabes a sangapulo ket lima nga aldaw laeng.
Saan laeng a local coaches iti nangisuro kadagiti atleta ta adda pay dagiti national coach a nangsanay kadakuada.
Impaganetgetna a dagiti participant a nakisali iti Batang Pinoy ita a tawen ket nasayaat iti pannakapilida ta adda dagiti proseso nga ar-aramidenda iti panagpili.
Agingga itay alas otso iti rabii (November 28, 2024) ket umabot iti uppat a pulo ket maysa ti medalya iti nagun-od iti probinsia.
Video – Prov’l Sports Coordinator Jonathan Pugrad
