Maisagsaganan ti kaso a maipila kontra ti maysa a babai a nanglimlimo iti maysa nga agtagilako iti Vigan City Public Market itay malem, May 25, 2026.
Ti biktima ket vegetable vendor nga agtawen iti limapulo ket siam nga agnaed idiay Barangay Anonang Menor, Caoayan.
Ti met suspek ket babai nga agtawen iti uppat a pulo ket tallo, awanan iti trabaho nga agnaed idiay Taguig City.
Segun ti biktima, napan ti suspek iti pagtagilakoanna ket gimmatang iti maysa a gallon iti catsup ken maysa a litro iti soy sauce nga aggatad iti P150.
Inyawat ti suspek iti P1,000 isu a sinuklian ti biktima iti P845.
Sakbay a pimmanaw ti suspek ket kiniddawna iti biktima nga ibatina pay laeng iti ginatangna banag nga inanamungan ti biktima, ket idi nasibet ti suspek isun ti panangkita ti biktima iti sangaribo idin naamirisna a peke gayam isu a sinapulna a dagus ti suspek a gappuanan iti pananglappedna.
Impanna ti suspek iti market office ken nagpaarayat iti Vigan City Police Station a dagus met a nagresponde iti nasao a lugar a rason ti pannakakemmeg ti suspek.
