Nakapagsaritan dagiti karaman iti aksidente a nakairamanan iti nagmaneho iti MPV ken Electric Bike iti national highway idiay Barangay Sacuyya Sur, Santa, Ilocos Sur tattay bigat, May 25, 2026.
Ti nagmaneho iti Gray Toyota Innova ket minaneho iti lalaki nga agtawen iti duapulo ket tallo, baro, holder iti non-professional driver’s license nga agnaed idiay Barangay Barong, Dingras, Ilocos Norte.
Ti met nagmaneho iti Black EMC-GOLF Electric Bike ket maysa a menor de edad nga agnaed idiay Barangay Sacuyya Sur, kaduana ti agtawen iti duapulo ket uppat nga indibidual a taga-An-annam, Bantay.
Iti pannaki-uman ti Bombo Radyo Vigan ken ni PCpt. Rovic Nelmida nga Acting Chief of Police iti Santa Municipal Police Station, agpapaabagatan a direksyon ti MPV idin nadanonna iti nasao a lugar ket kellaat a nagsikko ti EBike manipod daya a nagballasiw a nagturong iti laud a direksyon a gappuanan iti pananakdungpar iti MPV iti likod a paset ti EBike.
Kinuna ni Nelmida, agpada a nadunor dagiti nagkalugan iti EBike isu a naipanda iti Northside Doctors Hospital, Bantay para iti naan-anay a pannakatamingda, ket iti agdama nasayaaten iti kasasaadda idinto a ti driver ti MPV ken kakaduana ket saan a naan-ano.
Iti inisyal a nagsaritaan dagiti kameng ti pamilia dagiti karaman ket tumulong ti driver iti MPV para iti magastos iti pannaka-ospital dagiti naglugan iti EBike.
