Kiniddawen ti Office of the Ombudsman iti Sandiganbayan nga idalan ti hold departure order ni Sen. Jinggoy Estrada ken dadduma pay nga opisyal ti Department of Public Works and Highways wenno DPWH a kasoan ti plunder ken graft maipanggep ti mapapati a flood control kickback scheme.
Segun ken ni Assistant Ombudsman Mico Clavano, ti kaso kontra ken ni Estrada ket adda pakainaigan ti mapapati nga illegal budgetary insertions ken project allocations iti infrastructure portfolio iti DPWH para iti Fiscal Year 2025.
Maibasar iti reklamo, mapapati nga immawat ni Estrada ti P573 million manipod flood control kickback scheme.
Karaman kadagiti nakasoan da dati a DPWH Secretary Manuel Bonoan, Assistant District Engr. Denryl Caesar S. Cortuna, ken District Engineers Manny Bulusan ken Arturo Gonzales Jr.
Nagpalawag pay ni Clavano maipanggep iti sumagmamano nga orihinal a mairekreklamo iti kaso ta inikkatdan iti listaan ni DPWH Undersecretary Maria Catalina “Cathy” Cabral gapu iti pannakatayna.
Naikkat pay iti kaso da DPWH Undersecretary Roberto Bernardo, dati nga NCR Regional Director Gerard Opulencia, ken dati a Bulacan 1st District Engr. Henry Alcantara kalpasan a pormalda a nagbalin a testigo iti kaso.
