Bimmaba iti 16.9 percent ti gastos ti gobierno iti imprastraktura ken dadduma pay a capital outlays idi Agosto, iti gatad a P70.5 billion manipud iti P84.9 billion iti isu met laeng a bulan idi napan a tawen.
Segun iti Department of Budget and Management (DBM), nangapektar iti panaggastos ti Department of Public Works and Highways (DPWH) ti agtultuloy a bidding kadagiti sumagmamano a proyekto, saan a panangi-encash iti P10-B a gatad ti tseke para kadagiti kontratista ken supplier, ken panaglayus iti sumagmamano a paset ti Luzon.
Manipud Enero agingga Agosto, bimmaba iti 34.6 percent ti gastos iti imprastraktura ken dadduma pay a capital outlays iti P522 bilion manipud iti P798.4 bilion idi napan a tawen.
Inlawlawag ti DBM a daytoy ket gapu iti naing-inget a panangadal kadagiti proyekto, beripikasyon dagiti mabayadan ken panangsurot kadagiti procurement requirement tapno masigurado a naurnos ken dokumentado dagiti aramid a baybayadan ti gobierno.
