Impaganetget ti Philippine National Police (PNP) nga awan ti naited a ransom kadagiti dimmukot iti estudyante nga agad-adal iti maysa a high end private school idiay Bonifacio Global City idiay Taguig.
Segun ken ni PNP Public Information Officer Chief PCol. Randulf Tuaño, idi umun-una ket nagkiddaw ti kuarta ti abductors ngem saan a kabaelan nga ited ti nagannak ti ubing.
Inlawlawag ni Tuaño a napressure dagiti kidnapper isu a napilitanda a nangwaya-waya iti ubing gapu ti technical lead a sinurot iti PNP Anti-Kidnapping Group ken Human Intelligence dagiti otoridad.
Saan pay laeng a makumpirmaran ti PNP nu pudno a naputedan ti ramay ti ubing sakbay a nawaya-wayaan ta maur-uray iti medical assessment iti ospital nga ayan ita ti ubing.
Kitkitaen dagiti otoridad ti panakainaig ti ama ti biktima iti operasyon iti ilegal a Philippine Offshore Gaming Operators (POGO) iti pagilian.
