VIGAN CITY- Kinasoanen iti agdama a Philippine Councilor’s League (PCL) President ti executive director ti liga gapu kadagiti mapukpukaw a pondo.
Ti pannaki-uman ti Bombo Radyo Vigan, inbaga ni PCL President-Narvacan Councilor Luis “Chavit” Singson a naglablabesen ni Tantangan, South Cotabato councilor Wilson Paclibar gapu ti mapapati a panagkurimes na iti pondo ti liga isu a rumbeng na laeng a masursurwan ti leksyon.
Malaksid ken ni Paclibar a nakasoan, papaimbestigaran pay ni Singson dagiti dati nga opisyal ti PCL a karaman iti panangibulsa kadagiti pondo ti asosasyon.
Maipalagip a Marso idi inbaga ti dati a gobernador ti Ilocos Sur a saan a maipakita kenkuana ti nasao nga executive director iti namkaigastoan ti mapukpukaw a dakkel a gatad ti kwarta a napukaw idi isuna ti nangsublat ti liderato ti liga iti laksid nga adu dagiti maur-urnong da a kwarta manipud kadagiti PCL conferences.
Ni Paclibar ket sangapulo a tawen na a nagserbi iti nangato a puwesto iti organisasyon ngem adu dagiti nakairamanan na nga anomalya nga ita laeng a maduktalan babaen iti baro a liderato.
