Manamnama a maipila inton bigat ti kaso a panaglabsing iti Republic Act 9165 kontra iti maysa nga estudyante a nakemmeg iti buy-bust operation idiay Candon City, Ilocos Sur idi May 9, 2026.
Ti suspek ket agtawen iti sangapulo ket walo, street level individual nga agnaed iti ili ti Bantay.
Iti pannaki-uman ti Bombo Radyo Vigan ken ni PLt. Jovelyn Antalan iti Candon City Police Station, namonitor iti makalawas ti suspek kalpasan a naipakaammo kadakuada iti illegal nga aktibidadna iti nasao a siudad agingga naisayangkat iti pannakakemmegna.
Segun ken ni Antalan, mapapati nga adda customer-na iti siudad a gappuanan iti kaaddana iti nasao a lugar.
Kinuna ni Antalan nga inkalintegan ti suspek a naaramidna dayta ta awan ti trabaho ti amana ken awanen ti inana.
Maipalagip a naala kenkuana iti nasurok-kumurang uppat a gramo iti mapapati a hybrid marijuana leaves ken buds nga aggatad iti nasurok-kumurang P12,000 a naipan iti tallo a piraso iti self-sealing transparent plastic sachets.
