Naragsakan ti grupo a Rise Up for Life and for Rights, a buklen dagiti pamilia ken kabagyan dagiti drug war victims iti panagirruar ti International Criminal Court ti dokumento a naglaon ti nagan dagiti maipagarup a co-perpetrators ni dati a Presidente Rodrigo Duterte.
Segun ti sumagmamano a kabagyan dagiti biktima, nabayagen nga ammo da dagituy kas asideg a kaalyado ti dati a presidente.
Pinasingkedan ti grupo a nasken a maammuan ti intero a lubing no sino dagiti karaman ken adda pakainaiganna iti panangipatungpal ti nadara a kampania kontra ilegal a droga.
Binabalaw pay ti Rise Up for Life and for Rights ti addang ti depensa ni Duterte nga idauloan ni Atty. Nicholas Kaufman nga ipa-disqualify dagiti abogado dagiti biktima.
Namnamaen dagiti pamilia a matuloy ti confirmation of charges hearing iti kaso ni Duterte inton Pebrero 23 ken agtultuloy da nga ipaganetget a nasken a madusa ti dati a presidente iti kaso a crimes against humanity.
